samedi 2 octobre 2010

الشاذ لا يحسب ولا يقاس عليه


كل ما نركب في الترينو نبدا ننبر عليهم ويضهرلي غوثت عليهم ياسر هالنهارين وصار الحادث المشهود ...




نشالله بركة كل واحد ياخذ حقو من المصابين وعائلات المتوفين الزوز... إلى العامل وللى العمال اللي يضربو في النوم. والمسؤلين يتحاسبو عالكارثة هاذي من الشاوش إلى المدير ... على خاطر ما ضاهرليش كان الحكاية فيها "عين" ولغة عوامل طبعية ودز في "قضاء وقدر" تخطف ...



ما عليناش توة ...
موش هذا الموضوع...

عندي مدة نحب نكتب حويجة عالشركة التونسية للسكك الحديدية . وواحد مالناس كنت متوقع باش تصير مشكلة مالنوع هذا ...

بصيفتي طالب نسكن فالضاحية الجنوبية، ناخذ الترينو تقريباً كل يوم، كيما 90% مالموطنين اللي كيفي ...

حاجة طبيعية باش الواحد تطلعلو الكلبة بنت الكلب، ويدور بيه الدجاج الأكحل، وقت اللي يضطر باش ياخذ الترينو وللى يركب فيه في قالب غلطة ...

الواحد كي يبدا مالصباح لليل ينعم بالنظام (إممممم) يصيرلو "شوك" كيف يشوف العوج

باش ما نكونش سلبي و-" نيقاتيف " برشة ، ترينو الضاحية الجنوبية ما فيه شيء يصلح ... قطار "أوشفيتس"، اللي كان يهز اليهود لمعسكر الإعتقال في عهد المجرم هتلر ، أشب منو وكان يقدم خدمات أرقى ...
والشيء زاد على قدام مع أشغال التهيئة و كهربة السكة الحديدية ...

-عام كامل والرصيف محفور ومنقوب على طول الخط

- الترينو "كليماتيزي" في الشتاء و"شوفي" في الصيف ...

- الدرجة الأولى 80% من الشيمينو ومعارفهم ... كان عندك كارطة درجة أولى ب-200 دينار، ولقيت بلاصة؛ بوك باي.

- 75% من الشبابك ما يتسكروش وال 25% الأخرين ما يتحلوش ...

- ساعات يلزمك تترانا "حديد" باش تنجم تحل باب ...

- الأعوان المسؤلين عالأمن عددهم أقل مالقطارات...
- كان وصلت في الموعد المحدد أعرف اللي انتي خذيت التران اللي قبلو ...
- التدخين ممنوع على الأرصفة أما "الكنترولور" عندو ألحق يتكيف ...
- قريباً شقان السكة باش يولي ممنوع ومستحيل على خاطر الرصيف عالي ... الشيمينو خممت في فكرة عبقرية ... جسر للمشاة ... أكثر من 80 درجة بين طلوع وهبوط ... المعاقين والمسنين والحوامل والتاعبين والمرضة ،ياخذو تاكسي واللى كار صفرة ... القطار للأبطال .

والقائمة تطول وكان باش نقعد نتكلم تو يجيبو الترينو الجديد وانا مزلت ما كملتش ...

بعد هذا الكل وبما أني عندي فكرة عالأداراة والشركات العمومية في تونس، وشنوة الدولاب اللي صاير فيها والنظام والإنضباط المهيمن عليها ... نحس بالتناقض ...

تي شبي الشركة التونسية للسكك الحددية فقط ما تتحلاش بالنظام واحترام المؤسسة للمواطن ؟ في دولة النوم والمؤسسات

شبيها خارج السرب؟
!عجب

تي علاش ما يعملوش رسكلة عند البلديات مثلاً وللى "الأوناس" واللى وزارة التجهيز ؟


ويتعلمو النظام ويجتنبو العوج على قاعدة









الواحد آش عندو باش يقول؟ ... الشاذ لا يحسب ولا يقاس عليه وبره ... السماح!

6 commentaires:

fléna bent flén a dit…

يا نكار العشرة .. كول الغلة و سب الملة ... لوول
(و إلا على فازت '' وجهي مشلط انا ؟؟''
هههه...)

تي كي جات في اتران بركة .. نغضوا الطرف... (حومتي ما تغرقش برام برام نسكن بحذا رئيس البلدية(

Youssef a dit…

le luxe :(

Rania a dit…

lyoum zeda sabba7na 3la khbar accident ferroviaire mortel fi itha3atna elwatanya ema hetha esbab fih mouch "le mauvais temps" mais "la mauvaise gestion du chemain ferroviaire" welmouta mouch we7ed bark ema bitazina ye7sbou fihom!
te3bin fi indonissya! lazemhom chwaya siyessa 7akima w nadhra istecharafya w chwaya ichraf sami w ... ;)
w kennek 3almoutdharerin mat5amamch 7ou9ou9hom ma7foudha:
http://www.facebook.com/video/video.php?v=1635220362740&ref=mf

7atta lmou3a9in welmousennin zeda mat5ammach 3lihom 3andhom ayem watanya lahya bihom ;p

w brabbi lmarra ejjeya ki tji t9oul 9adech famma 7for walla 9addech etrain m3ebbi sabba9 machallah loooooool

Youssef a dit…

loool j'ai remarqué moi aussi l'intérêt envers l'accident de l'Indonésie ...
chouf Rabbi sob7anou mélla soudaff :P

machallah 3lina kol chay yjina (yousslélna )béllotf :D

EL FAN a dit…

sar inti mezelet terkib fihom etranet ???
ya sa7bi barra echri "103" walla 7atta trotinet w o9sod rabi lloollooll ... dima adhmen mel trinou :p

Youssef a dit…

n7éb él 25tilat bél taba9a él kédi7a :P