samedi 9 octobre 2010

حكاية الجنّان ... الجزء الأول




يحكيو أنو في قديم الزمان ... في حومة مالحوم العربي ... كانت فما دار، فيها جنينة كبيرة ...أما ما كانتش حلوة وتنجم تقول مسيبة شوية والحشيش طالع بزايد ...
وكانت في الدار تعيش عايلة قديمة مالبلدية، الدار على ملكهم من أول حجرة لآخر كواترو ، بناها الجد اللولاني قبل مئات السنين وضاعت منهم مديدة من زمان مبعد رجعت ...

أيا أكا مولى الدار ، كل يوم يحط كرسي في الفيراندة ويحل الجريدة يقرى ويبدا يترشف في القهوة ... ما عجبتوش كيفاش هكاكة مسيبة ودار الجيران المقابلة كيف الجنة .

ضرب أخماسو في أسداسو قال أول جنان يتعدى نعطيهالو باش يتلها بيها وتولي فيها قعيدة حلوة وضل وشجر ... حاجة تملى العين ...
ما تعداوش نهارين ، جا للحومة جنان يبرح ... راجل بدين ، يظهر نظيف وولد عايلة ... عيطلو مولى الدار وقالو ، هالجنينة هاذي كيف بنتك نحبك تتلهى بيها مليح وتحاسبني بيها كيف تكمل وأنا ندفعلك أجرك لآخر مليم ...

وبدا آك الجنان يخدم على روحو ... مالضربة لولة يظهر صنايعي ويدو خضرة ... وبدات الجنينة تتحسن ومالبطحة ولات كيف الجنة ...
وجا نهار الخلاص ... خلص مولى الدار الجنان وقالو ... "أنت راجل صاحب صنعة ... ماذا بيا كان تقعد تخدم في الجنينة ونولي نعطيك شهرية" ... وافق الجنان ورجع يخدم على روحو ... كل يوم الشيء يتحسن وتزيد الجنينة تزيان ... وولات فما كيف عشرة بين العايلة والجنان ...


أمشي يا زمان ايجا يا زمان ... أك الجنان كبر في العمر وحركتو رزنت ... قال نجيب صانع يعاوني عالخدمة ...
تعداو شهيرين ثنين، الجنان الكبير تعب شوية ... جا الصانع يقابل في مولى الدار :

- ماذا بيا كان نحكيو كلمتين سي الشادلي ...
- تفضل ولدي
- لا موش هوني ، موش قدام عم حمادي
- نشالله خير ، ايجا لبيت القعاد ...
- عم حمادي ، يا عم الشادلي
-شبيه ؟!!
- معادش يقدر وخايف لا يفسدلك الجنينة ...
- لا حول ولا قوة إلا بالله ... ربي يشفيه ... أي شنوة الحل توة؟
- عم الشادلي ، أنا قلت ، خليه يرتاح ... أعطيه لنتريت وهاو أنا تو نشد بلاصتو ... محسوب وليت ولد الجنينة ونعرفها شجرة شجرة ...
- خليني نخمم ولدي ... موك تعرف عمك حمادي هو الكل ويحب خدمتو، نخاف كان ننحيه يتغشش ويعمل حاجة في الجنينة ... وهذيكة راس المال يا ولدي ...
- لا ما تخممش!، ما عندكش علاش تخمم ... تي تصور تموتلك المدلينة وللى التفاحة وأنت مازلت حاير ... أيا نمشي نقلو ؟
- الله يبارك ... بناتنا، هو صحيح وللى يبلفط ووليت خايف لا يصير فيها حاجة ... أنت نعرفك تهنيني. برا توكل عل لله .
- نشالله نكون عند حسن الظن عم الشادلي وما ترى مني كان الخير ... أما هاو من توة راني مانيش باش نطول فيها الخدمة ... موك تعرف، الواحد كيف يكثر مالعسل يمساط، وأنا ما نحبش نغلط غلطة عم حمادي ... مديدة ونمشي على روحي ...
- الله الله عليك ... صنعة ومنطق ومباديء ... أنت الجنان اللي يلزم للدار !

7 commentaires:

EL FAN a dit…

" أما هاو من توة راني مانيش باش نطول فيها الخدمة ... موك تعرف، الواحد كيف يكثر مالعسل يمساط، وأنا ما نحبش تغلط غلطة عم حمادي ... مديدة ونمشي على روحي ..." lloollooll

za3ma ya3malha w ma ytawalech ... w trasi el 3am 7amadi w 3ayeltou ynachdou fih ??? :p

Venus a dit…

Et la suite c'est pour quand ??

sula7fet1 a dit…

@: El Fan: et oui c'est la question!!!
@venus: à la prochaine on va voire comment le petit jannen bech ya3mel son coup d'etat...

fléna bent flén a dit…

kén 3am 7ammadi issayéb ejnina n5aless 3lik chappati .. we ken essana3 ma irabich 3liha il kibda 7atta il mamet 3andek sandwich min 3and Lotfi :p

Youssef a dit…

@ EL FAN et Sula7fet : lool , ma ta7r9oulich él film 3ad ... yé3lém béya rabi fin l9it él imagination wél inspiration :PP

@ Venus : hay éttib la suite :D

@ fléna : aya 7adhér ro7ék mén tawa méla :p

M a dit…

haw 9allik el jannen mahouch ira fi rou7ou houa jannen w 3am hamadi moula eddar. Houa fibelou yekhdim fil jnina mzia w barra. Ti 7atta mil toffe7 ina77i w yekil. yekhi barrani houa?

illusions a dit…

Belle imagination Youssef, mais apparemment tu n'as pas cherché trop loin. Même notre ami Ammar l'a bien comprise cette histoire, mais il voulait juste attendre la description détaillées des bien faits de l'apprenti qui dépasseront de loin les exploits de si Hammadi.

Même si Chedli, et avec son age mcha ineched, et cette mounechda et l'un des grand exploit dans ce jardin de paradis :)