أحبك

توة عندي جمعة نحب نكتب أي حاجة في البلوغ وما نجمتش ...

موش المواضيع ناقصة ...
موش الخوف من جبدان الشبوك ، تي هذيكة هواية صاحب كل أسم مستعار وربي يدوم علينا ها النعمة ...

توة عندي جمعة، مللي بدات التحركات الشعبية العفوية في تونس ضد الدكتاتورية اللي فدينا منها العباد الكل... ملي اندلعت شرارة الوقيدة الأولى إلى ثوران بركان الشوارع، وانا نرعش ... بدني يرعش ومخي يرعش كيما ها التدوينة ...
موش خوف ، أما إكسيتاسيون ...
أول مرة نحس بالفخر لانتمائي لشعب تونس العظيم ...
أخشن شعب في العالم رغم الداء والأعداء لأحسن بلاد في العالم ...

نحس في روحي نحكي كيما الطفل الصغير ... أي شبيه حتى آنا تولدت من جديد ...
محلاه الإحساس بالوطن... كاينك كنت يتيم ولقيت أم وبو وأخت وخو وعم وخالة ودار وحومة ...

ممكن ها التحركات الشعبية بش تطفى ... ممكن بش تستمر وتزيد تقوى ...

موش هذا الأهم ...
المهم، شعب الأمة التونسية عندو توة وعي بمدى قوتو وذكاه وصمودو قدام نظام له من أكبر قدرات الحجب وقمع الحريات في العالم ...
شعبي لم يعد جبان في نظري ...
شعبي موش خواف ...شعبي موش جادور ... أما ذكي يعرف وقتاش وكيفاش يثور ...

توة فهمتك يا فرحات حشاد كيف قلت " أحبك يا شعب "

وللحديث بقية والمسيرة مستمرة بكل حزم ... بكل حزم ...

برد ...

ليوم آخر نهار في الجامعة،آخر نهار في القراية... ثمنتاش سنة قراية ...
ثمنتاش سنة قومة مع الفجاري ... كياسات مخيطة ... ثلج، صقيع، شهيلي،برد ...
أثناش سنة في الكار ... دزان ،روايح ،حوفة ....
وأعوام الشربة المفورة في الرستو ... الوسخ في الفوايي ... روايح الزبلة ... والشباك اللي يدخل في الريح ...

ستراس... ستراس ... إمتحانات ...ستراس... ستراس ... إمتحانات
ريتم كلب ...
خدمة عشرة سوايع في النهار... بلوشي...
تكسير كرايم ... تطيح قدر ...
مصروف ... كريديات ...

أما ليوم آخر نهار في الجامعة ...ليوم نهار الريزولتا...يعرف روحو مسلكها... ليوم يوفى الكرفي ...
"إيييييه ..."
تنهد وتبسم ... غزر رحو للمرايا يستوي في الكرافات ... شريها جديدة آسورتي عالكسوة اللي سلفهالو صحيبو المنجي ...
"إييييييييه ... هاو كل شيء وفى ... كل شي وفى ...يا ربي ! كل شي وفى ! "
أول مرة يحس في هواء بارد يدخل في رواريه ... عندو برشة ما تنفسش ...
كان يتنفس "بالباي" ...

غدوة يمشي يخدم ... يحب يعيش ... يعوض التعب ساعة ... يشيخ بشهريتو، مبعد يمكن يخمم في العرس ... مازلت الدنيا قدامو... لواه الزربة ...
كان تخطفلو يدبر كونتراتو في الخليج ... يكون... ويعمل كونت قمقوم في البانكة ...مبعد يرجع في البورش ...
"إيييييه"

أربعة سنين تعداو ... مازال ما جابش البورش ... ماروحش مالخليج ...تي ما مشالوش ... جرد كونت ما عندوش ... منتف مرمد ...
المنجي عبدو ... شدو ما سيبو ... يحبو يرجعلو كسوتو ...
أي وهو كان بش يرجعهالو ، باش بش يمد وجهو في بيرو الشغل ؟ ... يجعلوش يخلط على فشفاشة القوارص ، بش يشري لبسة جديدة ...
"يلعن بو ها العيشة الكلبة ... بففف.... والدين أم ها البلاد والمزيريا!! "
طفا السيجارو السادس مللي جاء للقهوة ... قام ، كلم القهواجي عالكريدي متع الكابوسان .. وخرج يكركر في سقيه ...
وصل فين يسكن ... نحى الباش ... هز البرويطة...
كمل حط النصبة في السوق ... أربعة وللى خمسة كيلو بردقان رصفهم ...
آش بش يبيعهم ... عشرين ألف نصبة بجنبو ... وهو جديد ما يفهمش في الدومان كيف الجموع ...
"إييييييييه وانا آش ملزني نقرا ؟ ... ونعمل في العربية ؟ ونتعلم في الشعر والنحو والأدب ؟!!..
بش ندور عالغلة نشكلها فماش ما تتباع ؟ ... نكتب غزل في الهندي والكرموس !! ... بففف"
جبد باكو الوقيد من مكتوبو بش يشعل السيجارو اللخر في باكو الكريستال ...
" ها فرخ !... موش قتلك تڨعد مالبارح ؟! ...شبي *** ما تفهمش ؟؟!! ... هز خراك و تجبد سي ال*** ! "
" تي فكو علينا عاد ... سيب صالح ... سايبو والديا عاد ... نكسر في راسي ونقرا ونضحي بش فاللخر نترممد !!! تي فك !! فك !!!"
" شيهمني في جد بوك أنا ! تجبد سي وذني عاد ... تحب نمرمدك كيف نصبتك ؟!!"
" أنت باش تمرمدني ؟!!!! "
...





"فين داخل هكا ؟ آش تحب ؟"
" باش نقابل سيد الوالي "
" ماهوش هنا "
" وهذيكة كرهبة شكون اللي دخلت عندها ساعة ؟ "
تي برا عاد ... شو شكون يحب يقابل سيد الوالي ... برا ترت !!"


"أووه يا ربي ... أووه ! راني جعت ... راني عطشت ... راني بردت ... بردت !!! "
هز بدون القاز اللي جابو ...
حل الغطا وصبو على رحو ...
"خير كي ما دخلتوش ... تي هاو مهبول هذا ، يصب في القاز وللى فش يعمل"
جبد باكو الوقيد...
شعل الوقيدة ...
ورماها في القع ... رمى معاها النصبة ... رما معاها الخدمة ... رما معاها البوليس والكرهبة والولاية والبرد ...
رما معاها المزيرية والقرايا والعيشة الكلبة ...
رما معاها كسوة المنجي والسنين اللي عداهم بيها ...

شعلت سنين الكسوة ...شعلت... وشعل معاها

hommage à Mohamed Bouazizi , à Abdeslem Trimech ... et à tous ceux que leurs âmes se consument sans pour autant bruler ...

نسيت

نحب ننسى ...ديما نسى ... ننسى شنوة فطرت البارح ، ننسى شنوة تعشيت ليوم ...
ننسى الوقت ... ننسى الكلام ...
ونبدا نهز وننفض ... نهز وننفض ... حتى يقولو مسكين مهمش وخرف على صغر سنو ... صغر العناب المنمش ، المكمش ...
ندخل و نخرج في الحلة ...نمهمش ... آش خير مالتمهميش ؟ نعيش درويش ويبنيولي قبة وزاوية ويشعلولي شمعة كل راس عام عربي و سوري...
نحب ننسى شباك الجنينة محلول في الشهيلي و الصقنصري ... ننسى ما نقومش, ساعات ما نرقدش ... ما نرقدش ، نخاف لا نكمل في الطويل ويتعدى النهار حرام ، كيفو كيف غيرو ...
نقعد راقد حتى يهزني النوم ...
كان قمت نحب ننسى ...
ننسى النومة والمنامة... ننسى روحي فين حطيتها قبل ماتاخذني عيني ... نلوج عليها... نلوج عليها وما نلقاهاش .هاذيكة تلقاها المرى اللي جابوها تخدم حطتها في السدة ... خلي غادي، رتحنا مالدوة وتطيح القدر ، و" يزي بلا بخل و " نقص مالنَسوة" ... كلو كلام يفشل ...يزيني بلا ضمير بلا همة بلا رويق ... نحب ننسى...

هي النسوة حاجة ربي ... وأنا نحب ننسى ... والمحبة حاجة ربي ... وانا فاش جيت باش نقول لروحي " نقص مالنَسوة" ...
الفايدة كي ننسى فين أنا قاعد ...
ننسى التراب اللي عايش فوقو ... سماوه بلاد ، بر ، وطن ...
أي خلي يسميو وانا فاش جيت ؟ جيت للدنيا قالولي هذا متاعك مديت يدي ، قالولي نحي ، يزي ، أهفت ريض ! حتى يقوم سيدك ... هز الفتفات وكان ما شبعتش أنسى الجوع ... موك تحب تنسى ...
شكون سيدي هذا ؟ جبتو ونسيتو ؟ ولا جابني هو ، وشادللي جنبي ما حبش يسيب ، ضرب لصق كي العلقة ... ضيف ثقيل، ماصط، ركيك ... قالولو راك ضامر نسى روحو وتمد كي المسند على طولو ...
نحب ننسى زنوس الحومة والعفش المكدسين عالعتب ... نحب ننسى عتب السيمان وعتب البنادم ...

ننسى سوم ربع الڨنرية ، و تنبري بو ميتين و سبعين ... شنعمل بالتنابر ؟ شنعمل بيهم كي ننسى كيفاش نكتب و نقرى ... و شكون باش نتذكر و نبعثلو جواب ؟ كلهم ناسيهم ...

نعيش كيف هاذوكم ، جلد على عضم ، عاملين كيف ، عايشين شايخين ... نحب نركرك التاي كيفهم و نحكي على خيرة الهجالة ...

نطلع في الترينو و ننسى روحي فين ماشي ... فين يهبطو نهبط وراهم... فين تهزني ساقيا نمشي... كيفهم ...

مبعد ننسى الثنية ... نقعد نتبع ... نتبع ... نتبع ...
حتى نلقى ثنية ما تعجبنيش ... ننسى القديمة و نتبعها ...
ننسى روحي قاعد بيناتهم وننساهم قاعدين بحذايا...
وللى ننسى روحي... ننسى روحي يزي

أنا حـــــرّ

أنا حرّ وحريتي ما توفاش ...
وانتي حرّ ، كيفك كيفي ...
لا حد يحكم فينا ولا نحكمو في حد ...
مانيش نفذلك ، نحكي بالمجد ...
أنا حر وحريتي ما توفاش ...


لا ... مانيش نسكن في الڨمرة
لا نكون مالسلطان ولا السلطان يكون مني
لا نعرف الحاشية ولا الحاشية يعرفوني
لا نحبهم لا يحبوني ...
نسكن في بلاد ... كيفها كيف كل بلاد ...
حجر وشجر وهوايش وعباد ...
برشة هوايش وشوية عباد ...


أنا حر ونتكلم
أنا حر ونصيح
خلي يسكتوني ...
خلي يهزوني ...
أنا حر بش ناقف ،
بعد ما نطيح ...
أنا حر بش نملى بحر الدنيا،
بعد ما يشيح ...


حر كيما القطعي حر،
كي يسرق ويخطف ويبني قصر ...
حر كيما المجرم حر ،
كي يقتل ويضرب ويسكّر البر ،
حر كيفهم وقت اللي يتشدّو ...
ويحكمو عليهم بش يشدو قفص ويتهدّو ...


أنا حر ...
ما لقيتش الحرية تتبختر في الثنية
لابسة سفساري وماشية بالنيّة
وخطبتها من بوها وهداهالي
وقالي عينيك عليها وهنيهالي


أنا حر وحريتي حرب ...
حرب مع كل حجرة وقفتلي في الثنية ...
حرب مع النوم اللي ينسي الهموم
حرب مع الليل اللي غطى الشمس عليا ...
أنا حر و حريتي حرب ...
حرب مع الخوف اللي ساكن جواجيا...



10 ديسمبر ، اليوم العالمي لحقوق الأنسان .

满足 挑战

ايجا أعمل طلة هوني قبل




وصاحو بصوت واحد :* 满足 挑战 !

ملاحظة : لون البشرة القزوردي والضحك ما عندهمش علاقة بالموضوع .

*ايجا

حسبة

اللّي حسب وحدو و فضلّو...

ولّى معادش يحسب و دار في الحسبة

خرجولو من فم الزّنقة قارينلو حسابو

قالو نحسبولو حسبتو و نخرّجوه مالحسبة

قعد يحسب فيها في مخّو

كي فهم حسبتهم ما حبّش يحسبهم

ما عينوش يحاسبهم ...

حتّى كان جاو حاسبينلو حسابو

هوما حسبتو حسبوها ... أما مزّالو ما حسبولوش حسابو

هز سبحتو و خلاّلهم حسبتو و تقعّد

قعدو يحسبو وحدهم

ياخي فضلّلهم مالحسبة

وللّي يقعدو يحسبو وحدهم يفضللهم

رجعلهم من فم الزّنقة وقاللهم

نعاودو الحسبة و احسبوني معاكم و كيف نكملو نحسبو ، نحاسبكم

وقعدو الكل يحسبو

وحدهم

في شطر الحسبة ، ضهرتلو الحسبة محسوبة من قبل

جبد روحو من حسبتهم وهزّ فاضل الحسبة

رجع منين جا و ماحسبهمش

حلّتلو حسيبة باب الدار و قاتلو هات نحسبهملك

قاللها، ما عيني في حساب ، حتى كان جاو يعرفو يحسبو

قالتلو، نحكي عالحسبة موش عاللّي يحسبو

قاللها، خوذ احسب ، اما هاذا راهو الفاضل موش الحسبة الكل

قالتلو، أوه حتى انا كنت حاسبتك فايق و فاهم الحسبة الكلّ

محسوب... هوكيف تجي تحسب حسبة صحيحة ،يطلع الفاضل خير من حسبة ما تتحسبش...