vendredi 19 novembre 2010

هزان ونفضان في بلاد السكفندري

باش نبداو واضحين ، في التدوينة هاذي باش نبدا نهز وننفض . على خاطر هالموضوع على قد ما يطيرهالي على قد ما نعمل عليه كيف ( هاني بديت نهز وننفض ) ... أما ميسالش البلوڨ بلوڨي قال الراجل. وما فيها باس الواحد يلم شوية دعا شرويعمل أعداء " دو تون زون تون " باهي التنويع ...
تي حاصيلو ...
ليلة العيد خرجت نطلفح في الشوارع ، قلت برا نمشي لكارفور ماركت متع الحومة (بعيد 12 كيلوماتر على الدار ) ..
أيا أنا متعدي في ريون حكك الطماطم ( ما ضاهرليش عندو علاقة ) ، نلقى مشهد كيما هكة
يدز في الشاريو...
هذا اللي يسميوه "اللباس الإسلامي".
أيا تعديت على روحي ومشيت للكاسة بش نخلص ، نلقى "أخاه في الإسلام" يستنى في الصف ...
أي شبيه ، هو واحد، هوما ثنين وكان يكمل الثالث تولي سنة حميدة و"جامي دو سون تروا"
وهذاكة اللي صار، أنا في طريقي للحومة تعدى بجنبي واحد يهرول لابس حوايج متع مسلمين "لو فري" ...
يقول القايل"سا أريف" والعباد مهما كانو ، حرين في لبستهم ولحيتهم وشلاكتهم ( غير إن شيوخ السنة مازالو في جدال مفتوح حول الشلاكة أبا إصبع )

المشكلة اللي منرفزتني، اللي أنا بيدي كنت نسخايل روحي مسلم ونتبع في آش قال ربي والنبي ، أما هاو ها الجماعة اللي عرفت منهم برشة قبل وبعد "التوبة" قالوك لازم تعمل ها العفصات متع الإسلاميين بش يعطيوك الفيزا للجنة

أيا شد عندك :
- طول اللحية ومالمستحسن تفيشها، وتحنيها ( هذيا لحقيقة من وحي الخيال ، أما تو يعملوها)، كحلة وحمرة كيف درابو روما ... هي الفكرة موش دونية أما بالرجولية بعد الخمسة متع الترجي نخاف لا نولي منعوط بالصبع ...
- أعمل عطفة في السروال ، وكون معاه بالقدر ... أي أما أنا كلاستي موش حاجة ليكس ، شعملنا؟
- عراقية مكية أصيلة ، مالمستحن ما تغسلهاش .
- عطر بو ميا متع الجامع (بطعم البيتنجال) ... قالك فيه بركة ماشالله ...
- كي ترى طفلة "متبرجة" (تفجع الكلمة) في الكار ، ما تقوملهاش. وإستغفر الله بصوت علي ، كيما وقت اللي تتڨرع ...
- كانك أنثى ( أي بديت بالذكورة على خاطر قالولي "سي لا نورم" ) ألبس سكفندري ... وحسب آخر المستجدات كمل -- -غطي عينيك ...
- ألبس قفازات ...
- ألبس كلاسط في اوسو ...
- كان في الإمكان ، أدفن روحك بالحيا ، هكاكة نرتاحو الناس الكل ... ونعملو بلعة ، إسلامية بطبيعة الحال، كيما يعملوها الملوك والأمراء متع الحفرة العربية السعودية وشيوخهم المضرحين ( ما ضاهرلي كان يبداو صاحين كي يعملو فتوات كيما ارضاع الكبير )
كان محاولتك في الإنتحار بائت بالفشل ، صب قنوات النيل سات للدعوة في البارابول، (مالمستحسن دريمبوكس ) وما تنساش باش تفسخ قنوات الدعارة، والملحدين، والمرتدين، والصليبين، والشيعة، والموسيقى، والرقص، والسنما، والمسرح، والرياضة ... لخرين الكل خليهم ميسالش يجوز ...
- أعمل كونط في بنك الزيتونة
- فسخ الراديوات الكل وخلي كان الزيتونة ومن المستحسن تسمعها بأقوى صوت باش يكون "لك الأجر في نشرها"
- إلخ إلخ إلخ ...
برشى جو وهزان ونفضان يطير الكيف ، باش ما نقولش حاجة أخرى ناقصة " داليكتيس"

إذن أخي في الله كان لقيت روحك ما تتجاوبش مع هذه الشروط يأسفني إن أعلمك إننا لا يمكننا إن نهديك "أطمئنان قلبك"

أيا أنا هاني طلعت مسلم مضرح أنا ... أيا سيبوني نمشي نمضمض فمي بالسواك مالذنوب ونتخمد نرقد ... بلا هزان ونفضان ... لا ترصي اخوتي في الإسلام ما يرضاوش عليا ويكمبسوهالي نهار آخر ...

ماللخر لكم دينكم ولي ديني و"ربي يهدي"

ملاحظة : التدوينة هاذي عملتها كرد على نسبة البهامة أللي وصلولها عباد نعرفهم شخصياً .

jeudi 18 novembre 2010

7ell blog

قلنا عيدكم مبروك .
ساعة قبل ما نبدا نهر ، لازم نحكي على حدث هام في بلوغوسفارنا التونسي ، إنطلق البارح

حل بلوغ 7ell blog

على خاطر حتى حد ما ينجم يعبر كما أنت تحب في بلاصتك !
كانك تلميذ واللى موظف وللى طبيب وللى طالب وللى فنان وللى بطال
على خاطر تحب تحكي ، فن ، كورة ، سياسة ، ثقافة ، تحب تحل فمك ، تحب تصيييح...
تنجم انتي زادة تحل بلوغ !
كان مزلت متردد وللى ما عندكش فكرة واضحة على التدوين ، ايجا للصفحة وللى البلوغ ، مجموعة مالمدونين- منهم العبدوللله- باش يكونو حاضرين بش يعاونوك تعمل خطواتك لولى ، وتدخل في الجو متع البلوغوسفار ؛)
أكثر من 20 بلوغر جديد في أقل من نهارين
وأنت فاش تستنى ؟
فازي !

mardi 9 novembre 2010

Cupidon ... cet immigré clandestin


Quand l'amour devient un crime , il faut oser haïr .
Quand le fait de donner sans recevoir dérange, le mieux est de rompre cette oeuvre semblant caritative ...
Faut-t-il dénoncer cet étranger ?
faut-t-il l'expulser et le renvoyer de là ou il vient ?
Qu'il reprenne sa place parmi les Dieu dans sa saleté de panthéon ...
qu’il dégage et arrête de nous jouer la comédie du pauvre clandestin avec son air de chien battu ...
Après tout, l'homme n'est qu'un animal, moins bête que les autres selon un raisonnement Darwinien et beaucoup plus pistonné selon un autre raisonnement biblique .

Aimer , on le sait maintenant , c'est contre nature . sinon comment pouvoir diffuser son patrimoine génétique dans une progéniture nombreuse et abondante si on exclu nos union à une seule ... celle avec une unique créature mortelle au ressources physiologiques limitées .
Aimer c'est aussi une profanation, si cet amour n'est pas une adoration réservée pour Dieu .



J'ai tellement de fois enfreints ces règles basiques , fades , plates , mais logiques et sensées .
j'ai longtemps opté pour un comportement au conséquences chaotiques . c’était seulement pour goûter à des plaisirs éphémères que je croyais emporter avec moi dans mon tombeau .
Mais combien de fois je fus giflé par la dureté des faits ... et combien de fois je fus fou pour vouloir continuer ...

Aujourd'hui , j'ai décidé de quitter ce vieux compagnon de route ... et même si je continuerai à croire à l'amour , je ne le vivrai plus .
Aujourd'hui , j'ai décidé de déchaîner ce qui m'est resté d’âme solitaire ...


Ma chère amie , je t'ai tellement aimé , et je t'aime comme je n'ai jamais aimé ... mais je ne suis ni un Dieu ni même un demi . et entre vivre , ou survivre dans cet enfer de sentiments que je t’épargnerai la description... mon choix reste celui d'un humain ... d'un homme qui paye le lourd prix pour avoir oser abuser de ces jeux interdits .

vendredi 5 novembre 2010

حكاية الجنّان ... الجزء الثاني




في الحلقة الأولى( هنا )، خلينا صانع الجنان ماشي لعرفو "الجنان الأكبر" عم حمادي، باش يعلمو اللي المكتوب وفى مع سي الشادلي، واللي من هنا فصاعداً باش يولي هو العرف والصانع والخدام والبترون ، في يده الأمر والنهي ...

نهارتها طقس شتاء والدنيا باردة ... والسماء تجيب الكبي



- آه عرفي .. هانية ؟
- لاباس ... عندي ضهري يوجع فيا، وساقي عاكشة، ومقبيلة شوية طاحلي السكر، وزيد حاسس قلبي غامم عليا هالمدة ... أكهو . سينون لاباس فمتلا ...
- شقولك كان ترتاح شوية عرفي ... موش وقيت ؟
- إيه صحيح ... حتى أنا هذاكة شقلت ، كان قعدت عندي وجاعة بش ناخذ نهيرين كونجي حتى نرجع في فورمة كيما قبل .
- لا لا يا حمادي ... ما فهمتنيش. أنا حبيت نقول ....

عم حمادي وجهو تبدل ... قرن حواجبو وغزر للصانع غزرة مسمامة ...


- نعم ؟؟؟ شنوة هاذي حمادي حاف ؟؟؟ لاباس ماهو سي الشباب ؟؟ أنداد ؟ قيمتي من قيمتك باش توصل تعيطلي بأسمي ؟؟... كل شيء نسامح فيه ... كان تطيح القدر وقلت التربية ... لا والله هايل ... هاايل ياسر !! ... من ليوم تهز شلڨاتك و ملاڨاتك و معادش نحب نرى وجهك مرة أخرى في جنينتي !!! أيا شبيك واقف تبحلقلي ؟؟ تصرف من قدامي عاد !
تبسم الصانع وشعلت في عينيه فلام ... لونها قزوردي ... وغزر لعم حمادي بكل "حنان"

-معلم ، شبيك وليت ترعش ؟ هذا الكل على خاطر عيطلك حمادي ؟ وسع بالك يا شيخ، موش باهي للقلب راهو... وشنية هاذي "جنينتك"؟؟ ... يزيك ما كليت منها تفاح وسفرجل، ويزيك ما حفت عم الشادلي راجل نية ودوبو دوب روحو المسكين ... خلينا ناكلو معاك صحوبا ... حتى أنا نحب نكون عايلة، ونشري 404 باشي، وندور الدولاب من لحية الدغف راهو ... أهوكة كلمتلك تاكسي باش تروح بيك، ومن هنا فصاعداً تاخذ الانتريت ... أيا بابا العزيز ، حضر فاليجتك تو نرجعلك مبعد نتفقدك ...

- اااه ؟؟؟ شنوة ... شنوة انتريت ؟ ... ش... ش ...شنوة باش نروح ؟ ... علاش ... علاش عيش ولدي ... راني كيف بوك ... راني ...آه راسي آه ...
- خلينا ناكلو معاك خبيزة ... شنوة؟ تاكل الدنيا وتتسحر بالآخرة ياخي ؟
وطاح عم حمادي ما في عينو بلة ... ما فاق كان في الكلينيك دايرين بيه عايلتو وشوية فرمليات ...


يتبع ...

مونا قلنا لا


http://www.facebook.com/event.php?eid=154234117953424


لن نحتفل ما دام الحجب موجود .. على خاطر عندنا مدّة نندّد بحجب المواقع و المدونات و صفحات الفايسبوك و ما سمعنا حدّ و ما إهتمّ بينا حدّ و لذا قرّرنا باش نحجب السابع من نوفمبر و نخليه نوط فاوند.. مشرفي صفحات الفايسبوك الكلّ مدعوّون لحجب كلّ مظاهر الإحتفال و تعوضها بصور تندّد بال 404 نوط فاود الي يهدّد في كل صفحة و في كلّ مدونة و في كل موقع..


هو كي تجي تشوف ، حتى كان ما فماش حجب ، مانيش محتفل ... سافا ؟